Exo 11 | NdeIBE | STEP | Ngalesi isikhathi uJehova wathi kuMosi, “Sekusele ukuthi ngehlise uhlupho olulodwa kuFaro laphezu kweGibhithe. Ngemva kwalokho uzaliyekela lisuke lapha, njalo liphume eselixotsha lonke.

Exodus 11

Uhlupho lokubulawa kwamazibulo

1 Ngalesi isikhathi uJehova wathi kuMosi, “Sekusele ukuthi ngehlise uhlupho olulodwa kuFaro laphezu kweGibhithe. Ngemva kwalokho uzaliyekela lisuke lapha, njalo liphume eselixotsha lonke. 2 Tshela abantu ukuthi amadoda labafazi ngokufananayo kabacele kubomakhelwane babo izinto zesiliva legolide.” 3 (UJehova wenza amaGibhithe aba lomusa ebantwini, loMosi uqobo wahlonitshwa kakhulu yizikhulu zika-Faro langabantu.)

4 Ngakho uMosi wasesithi, “Nanku okutshiwo nguJehova: ‘Phakathi kobusuku ngizahambahamba kulo lonke elaseGibhithe.

5 Wonke owesilisa olizubulo eGibhithe uzakufa, kusukela ezibulweni likaFaro ohlezi esihlalweni sobukhosi kuthathe kanye lezibulo lesigqili sentombazana esisebenza ukuchola, kanye lamazibulo ezinkomo uqobo. 6 Kuzakuba lesililo esikhulu eGibhithe lonke, isililo esingakaze sibe khona njalo esingayikufa saba khona lanini.

7 Kodwa kwabako-Israyeli akuyikuba lanja ezakhonkotha umuntu loba inyamazana.’ Lapho-ke lizakwazi ukuthi uJehova uyawabandlulula amaGibhithe kuma-Israyeli.

8 Zonke izikhulu zakho lezi zizakuza kimi zimbele ubuso phansi phambi kwami zisithi, ‘Hambani, wena labo bonke abakulandelayo!’ Ngemva kwalokho ngizasuka.” UMosi wasesuka kuFaro elokhu ezonde evutha umlilo.

9 UJehova wayesetshilo kuMosi wathi, “UFaro uzaqinisa intamo, ukuze zande izimangaliso zami eGibhithe.”

10 UMosi lo-Aroni bazenza zonke izimangaliso lezi emehlweni kaFaro, kodwa uJehova wayenza yaba lukhuni inhliziyo kaFaro kaze abavumela abako-Israyeli ukuthi baphume elizweni lakhe.